هەواری شار ستریت ڤییو | The American University of Iraq Sulaimani

هەواری شار ستریت ڤییو

Wednesday, March 28, 2018 - 14:45

سەنتەری CIDA بۆ توێژینەوەو راوێژکاری و راهێنان – سەر بەزانکۆی ئەمریکیی سلێمانی ، نمونەی بەرایی پڕۆژەی 360 Street viewی لەپارکی هەواری شار تەواو کرد کە دوەم گەورە پارکە لەڕۆژهەڵاتی ناوەڕاست.

شایانی باسە کۆمپانیای Google ساڵی ٢٠٠٧ تایبەتمەندییەکی نوێی بۆ Google Maps و Google Earth  دانا کە پێیدەگوترێت Google Street View. تایبەتمەندیی Google Street View خزمەتگوزاریی گەڕان بەناو شارو شارۆچکەکانی ئێرەو ئەوێی دنیا، لەڕێی کۆمپیوتەرو مۆبایلی زیرەکەوە، دەڕەخسێنێت بۆ بەکارهێنەرانی تۆڕی ئینتەرنێت، وەکو ئەوەی بەکارهێنەرانی تۆڕەکە بەخۆیان لەناو شارو شارچکەکدابن.

لەماوەی دەیەی رابردودا کۆمپانیای Google فراوانکارییەکی زۆری لەم بوارەدا ئەنجام دا، بەجۆرێک کە چەندین ناوچەی دنیای گرتەوە، ئەمە وایکرد ئەم تایبەتمەندییە "تایبەتمەندیی گەڕان بەشاراندا لەڕێی ئەنتەرنێتەوە"، ببێتە رێگەو ئامرازێک بەدەست بەکارهێنەرانی ئینتەرنێتەوە بۆ ئاگاداربون لەپێگەی شاران و وڵاتان، بەمەبەستی جۆراوجۆر: دۆزینەوەی شوێنی گونجاو بۆ بەسەربردنی پشو ، کارکردن و ... هتد، بەڵام لەگەڵ ئەوەشدا ئەم خزمەتگوزارییە هێشتا عێراقی نەگرتۆتەوە.

بەهەرحاڵ لەگەڵ ٢٠٠ وێنەو ١٠٠ سەعات کارکردن لەروبەری نزیکەی ١٠٠٠ مەتردا، خۆبەخشانی سەنتەری CIDA کە سەنتەرێکە بۆ توێژینەوەو راوێژکاری و راهێنان – سەر بەزانکۆی ئەمریکیی سلێمانی، خوازیارن سەرجەم شەقامەکانی سلێمانی، هەروەها لەکۆتاییدا هەمو ناوچەکانی عێراق ، روماڵ بکەن.

ئامانجی پڕۆژەکە بریتییە لەڕوماڵکردنی شارە گەورەکانی عێراق، بەرلەهەمویان شاری سلێمانی، بەمەبەستی دەرخستنی سروشتی راستەقینەی عێراق، راکێشانی گەشتیار، هەروەها ئاڵوگۆڕی فەرهەنگ و رۆشنبیری.

لەمبارەیەوە د. هێمن لەتیف – بەڕێوەبەری سەنتەری CIDA دەڵێت: پڕۆژەی هەواری شار ستریت ڤییو سەرەتای گەشتێکی دورو درێژە، بۆ بنیاتنانی بناغەی شارێکی زیرەک، بەبەکارهێنانی نوێترین داهێنانی تەکنەلۆجی. 

بەپێی بۆچونی گروپی جێبەجێکاری پرۆژەکە، هەڵبژاردنی پارکی هەواری شار بۆ جێبەجێکردنی ئەم پڕۆژەیە، بەهۆی گونجاویی سروشت و هەڵکەوتەی پارکەکەوە بوە، بیرۆکەی پڕۆژەکەش لەسەرەتاوە وەها داڕێژراوە کە سەرجەم شاری سلێمانی بگرێتەوە، بەڵام بەهۆی سنورداریی ئامرازو تواناوە، بڕیار دراوە جارێ تەنها ئەم نمونە بەراییەی لێ جێبەجێ بکرێت.  

پێویستە بگوترێت: ئەندامانی ئەو گروپەی کە جێبەجێکردنی پڕۆژەی هەواری شار ستریت ڤییوی گرتۆتە ئەستۆ، بریتین لە: خاتو شێنێ محێدین، کاک بەرزی بەهزاد، د. هێمن لەتیف.  

بەکارهێنەرانی تۆڕی ئینتەرنێت دەتوانن لەڕێی ئەم لینکەوە سەردانی پارکی هەواری شار بکەن: https://goo.gl/zCJHMi